ملائكــــــة الجحيـــــــــــم

حد فيكوا قبل كده دخل مستشفي حكومية
شافها من جوة
شاف السراير عاملة ازاي
شاف معاملة المريض من الدكاترة والممرضات وحتي العمال بقت أزاي
للأسف بقي انا بتعامل مع الموضوع ده كل يوم
كل يوم لغاية ما وصلت لمرحلة ان انا ما بقيتش قادر
والله حرام ان احنا نقول عليها مستشفي
ممكن نقول عليها مخزن. بدروم
حاجة زي كده بس اكيد دول مش مستشفيات
بغض النظر عن ضعف الامكانيات اللي هي شبه معدومة
وبغض النظر عن الخدمة اللي ما بتتقدمش
وبعض النظر عن الأكل اللي ما تقدرش تبصله او تشم ريحته
كرامة المريض وخصوصيته أخر حاجة ممكن تلاقيها
أزاي مثلا يبقي في اتنين مرضي نايمين علي سرير واحد
أيه ده ؟ عمركو شفتوا كده
ده حتي علي افتراض ان مافيش حد منهم عنده مرض معدي
ده حتي لو مش تعبانين ولو حتي صحاب
مش حيرضوا يناموا في سرير واحد
بس نعمل ايه
كل ده علشان ما معهمش فلوس يتعالجوا فيها بكرامتهم
شابه في العشيرينات من عمرها
صحت الصبح حست بورم في صدرها
وعلشان معهاش فلوس
لازم ترضي بالوضع ده
لازم ترضي ان ستين طالب يكشفوا عليها يوميا
انها تكون قدام كل دول عارية
وكل واحد منهم يكشف عليها
ايوة دول دكاترة
وايوة كل دول بيبصولها بنظرة مهنية بحتة
وانها بالنسنة ليهم مجرد حالة وخلاص
بس برده
فين ادمية الأنسان
فين خصوصياته
بالذمة واحدة زي دي هي اصلا مكتئبة بسبب مرضها
ايه حتكون حالتها النفسية بعد ما كل دول يكشفوا عليها
وأنا كنت واقف وسطهم
مستني دوري علشان أكشف عليها
بصيت في عنيها لقيت دمعة محبوسة
وكان اهات العذاب تجمعت في داخلها
وتمثلت في دمعة تأبي ان تظهر
وكأنها تلملم بقايا كرامتها المبعثرة
ساعتها حسيت أن انا مش دكتور او حابقي دكتور
كنت حاسس اني عشماوي واقف امام متهم محكوم عليه بالأعدام
واغمض عينيه وأستسلم لمصيره
فعلا مقدرش اقف قدامها
مقدرتش أكشف عليها
حتي لو مش حتعلم
حتي لو مش حانجح في الأمتحان
حتي لو كانت الحالة دي سبب في ان أنا اتخرج بتقدير امتياز
اكيد مش حاكون السبب في جرح مريض
جرح لايلتئم أبدا