تاج الصداقة

تـــــــــــــــــــــــــــــــــاج
بس حاجاوبه
لأنه من صديقتي العزيزة
مـــــــــــــــــــــا علينا
بس ما حدش يحاول تاني
والنبي

لو قالولك اختار عصر من عصور مصرعلشان تعيش فيه تختار اى عصر و فى عهد اى حاكم .. واشمعنى؟
اعتقد اني حاختار عهد الفراعنة
مش مش عارف اي حاكم بالضبط
بجد كان نفسي اعرف كانوا عايزين ازاي
ازاي بنوا كل الحاجات دي
انا مقتنع انهم كاموا ناس عظماء
بس للاسف لو كنت عشت ايام الفراعنة
ماكنتش قعدت جاوبت التاج ده

اول اولويه فى حياتك عيلتك ولا شغلك ولا اصحابك؟
أولا : العيلة
ثانيا : الاصدقاء
ثالثا : الشغل
بس بحاول اني ما اجيش علي حاجة لحساب حاجة تانية
وبحاول ادي لكل حاجة حقها
بحـــاول

ايه اكتر حاجه بتحبها فى رمضان؟
بالنسنة للروحانيات : مافيش زي دعاء صلاة التجهد
ساعتها بحس اني واقف في الحرم
وبالنسنة للدنيا بقي : طبعا مائدة افطار تجمع عليها كل من احب

اوصف ليا اجمل فطار ممكن تفطره ؟
مكرونة بالبشامل بس تكون جدتي هي اللي عاملاها
لاني مقتنع انه مافيش حد بيعرف يعملها زيها
ربنا يخليها يارب
وطبق سلطة كبير جدا
لاني اكتر حاجة بحبها في الاكل هي السلطة
وفراخ بانيه
وبعد كده بقي ايه
طبق كنافة بالقشطة كده والمكسرات
وشوية كده وتروح شارب كوباية عصير مانجو
وابقي قابلني بقي لو عرفت تتحرك من السرير

لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟
اكيد حابذل كل جهدي علشان اكون عادل
واكيد طبعا لو ماكنتش عادل في موقف فاكيد انه مش قصدي
وعلشان اتاكد حاوزع استفتاء علي كل الناس
واسالهم اسئلة من اجابتها ممكن اعرف
وحاقول لكل الناس اللي شايف اني ظالم
يجي ويقولي في وشي مش حازعل بالعكس حاكون مبسوط
ولو كانت العلاقة يني وبينهم مبنية علي الحب
اكيد حتي لو ظلمتهم حيبقوا عارفين اني مش قصدي وحيسامحوني

اللى بيبوظ الحكام .. نفسهم؟ ولا الشعب؟ ولا الحاشيه المقربه؟
اكيد مافيش حاكم عايز يكون وحش
واكيد برده الشعب عايزه يكون كويس علشان يحكمه بالعدل
علشان كده لو في حاشية فاسدة حول الحاكم
اكيد حتكون سبب فشله وظلمه
مين أكتر اعلامي مصري بتحترمه؟

عمرو أديب
قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟
لو اه ايه رايك فيه؟
ما قريتهوش
لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟
كان نفسي اكون طيار
ايه تانى بلد تتمنى تعيش فيها بعد مصر؟
استراليا
اوصف ليا ترتيبات اجمل فرح ممكن تحضره
يكون فرح في فيلا كبيرة كده ويكون علي حمام السباحة
وتكون في ركن للاقارب وركن تاني للاصدقاء والشباب يعني علشان ما يزهقوش
وتلاقي فجاه دخان كتير جاي من الفيلا
وتطلع منه العروسة ماسكة ايد والدها
وبعد كده العريس ياخدها ويرقص معاها علي انغام موسيقي الساكس

بتراعي كلام الناس والقيل والقال؟ لو اه او لو لا قول لى ليه؟
طالما أنا بعمل حاجة مقتنع بيها
وحاسس انها صح
فلو حد اتكلم فاعتقد اني مش حاعيره اي اهتمام
صحيت من النوم ما لقيتش الموبايل ولا الكمبيوتر ولا الكاميرا الديجيتال
ولقيتنا رجعنا لعصر الحمام الزاجل والحصنه هتكون سعيد؟
لا طبعا مش حاكون سعيد
لاني دلوقتي لو انا عايز ممكن اعيش نفسي في عصر الحمام الزاجل
بس في عصر الحمام الزاجل لايمكن اعيش نفسه في العصر ده
ثانيا هي الحياة تكون حياة من غير اصدقائي المدونين

السعاده هى؟
مافيش معني مطلق للسعادة
بس اكيد حاكون سعيد لو حققت اللي انا عايزه
اكيد حاكون سعيد لو نمت من غير ما افكر في حاجة ضايقتني
لو نمت وانا مافيش حد زعلان مني
لو جالي تليفون من شخص بحبه بيسلم عليا
لو البنت اللي انا بحبها كانت بتبادلني نفس الشعور ده
في معاني كتير تانية للسعادة اكيد مش فاكرها دلوقتي

عندك أمل ؟؟ أسبابك ؟
اكيد طبعا عندي امل
الدنيا من غير أمل مالهاش لازمة
ايه حنبقي عايشين كده وزي ماتيجي
طب ايه لازمتها بقي
لما تحب تهرب من كل شئ بتروح فين؟
بروح اقعد في البحر عندنا في اسكندرية
علي صخرة بحبها جدا
واقعد افكر في الحاجات دي لغاية ما الاقي حل
امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟
لما مرة واحدة صحيت من النوم لقيت نفسي في سنة سادسة
وكلها سنة واكون دكتور
ياجدعان ده انا لسة داخل سنة اولي امبارح
فعلا الايام بتجري بسرعة قوي
لما بتعمل عمل خيرى بيكون ايه هو دافعك الاول؟
طبعا باكون قاصد عمل الخير للخير لربنا يعني
وطبعا للناس اللي انا بعملهم الخير ده
بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟
نعم , للأسف
ومبحبش اشوف ست بتشرب سجاير بالرغم من انهم بقوا كتير
بس بحس ان السجاير دي بتاخد منها رقتها اللي هي سر انوثتها
بتعرف ايدك اليمين من الشمال ازاي؟
من اول ما اتولدت وانا ما بعرفش اعمل حاجة الا بايدي الشمال
اصل انا اعسر
ايه اكتر اله موسيقيه بتحبها ؟ ايه اكتر اله موسيقيه بتحبها ؟
الساكس والقانون و الجيتار بالترتيب كده
فى رأيك ليه الذوق والنخوه اتعدموا؟
مافيش قدوة
ايه الحاجه اللى لو حصلتلك تبقى سعيد قوى؟؟؟
ما انا لسة مجاوب مفهوم السعادة بالنسنة ليا
تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟
انا مش طماع عايز عربية اقعد الف بيها طول النهار والليل
بس تكون العربية علي مزاجي
البحر و لا النيل؟
البحر طبعا
مركب و لا طياره؟؟
طيارة
مجنون و لا عاقل؟؟
كل واحد في الموقف بتاعها
تقرأ كتاب و لا تتفرج عليه فيلم؟
اتفرج عليه فيلم بس تكون اجنبي علشان يكون واقعي شوية
بتمرر التاج لمين؟؟؟
ههههههههههههههههههههههههه
انا عمال اكتب من الصبح مستني الكلمة دي تيجي
ولا اقولك علشان ما حدش يزعل
اي واحد يقرا البوست وعايز يجاوب التاج ياريت يجاوبه
بس بقي مــــا علـــينا ليها تاج مخصوص انا بقي حاضره ليها

سلاماتي لكل اصدقائي

الأصيــــــــــــــل